මගේ අලුත් බ්ලොග් එක.

අවුරුදු ගානකින් කවි ලියවෙන්නේ නෑ. ඒ නිසා වෙන ලියවිල්ලක් පටන් ගත්තා. මේ තියෙන්නේ මගෙ අලුත් බ්ලොග් එක. කවි නෑ. කතා විතරයි. වෙලාව තියෙන වෙලාවට පොඩ්ඩක් ගොඩ වෙලා කියවල බලන්න. ස්තූතියි !

https://rasikasanjeewa.blogspot.com/

Read more...

කාබුල් කවි.

කාබුල් කවි.

සද වැක්කෙරෙනවා

හින්දුකුෂ් කන්දෙන් පහලට

පොලවට එන්න පෙර සද දිය

උරාගන්නවා දුහුවිලි දුම් දමන මහ පොලව

පල්ලියක යාදිනි ඇසුනත්

ගව් ගනනක් දුරට

වෙඩි හඩ ඇසෙන්නේ

ඊට තරමක් මෙහාට .......

කලු ගැහුනු නිල් බුර්කාවෙන් වැසුනු හදවත්

කාසි යදිනව මග දිගට

කිලිටි ඇෆ්ගානි ඩොලර්

එක දෙකක් වැටෙනව

පහලට

බොහොම ඉදහිට

ගොන් කරත්ත වගේම ලෑන්ඩ් කෲසර්

හිමිහිට ගාටන පාරට

කදුළු වහිනව 

වැස්සටත් වැඩිය.

කෙසග කාබුල් නදිය

නුවර මැදින් යන්නෙ ඕනවට එපාවට

සුදු හශීෂ් දුම් රොටු

ගං දෑලට ඉහලින් මිහිදුම් වෙනුවට

මනුස්සකමට වරම් අහිමි

හැල්මේ දුවන ආත්ම එක දෙකක

විදවිල්ල නිම කරනවා

නිතරම පුපුරණ

තලේබාන් බෝම්බ.

2016.10.07

Read more...

තිලකා ඇවිත්

තිලකා ඇවිත්
ජීවිතය මල්ලක දාගෙන
අමු මිරිස් තුනපහ
සීනි සීයක්
ගංජ මිටියක්
...

කාසෙට හොද නෑ තමා
දොස්තර දැක්කොත් බැනුං
ඒ උනාට උන්නැහෙට තේරෙන්නෙ නෑ
අපේ ජීවිත වල දිගක් පලලක්
ලියන ලැයිස්තුවට පෙති
ෆාමසියෙන් අරං
බොනවට වඩා ගංජ හොදයි සුමනෙ
කැස්ස තුනී වෙනව
ඇස් වලට නිල් එලි එනව
කොහුමෝලෙ මුදලාලි
ජීවිතේ උකස් කරපු දෝනිගෙ ඇස්
ඒ නිල් එලිය අස්සෙ පේනව
එක පාරට ගැස්සිල
පියවි ලෝකෙට එනව
තිලකා ඇවිත්
ජීවිතේ මල්ලක දාගෙන

Read more...

අප්පච්චි ගිහින් දුර ඈත

සුර බිළිදියන් එක්ක
හීනෙනුත් සෙල්ලම් කර
පාන්දර කිරිසුවද සයනයෙන් නැගිට
අප්පච්චි හොයන්නට දුවන්නට එපා දෝණි
චූටි මැනිකේ නිදි අතර
අප්පච්චි ගිහින් දුර ඈත

කදුලු වැක්කෙරන ඇස් වලින්
දුවට සමුදෙන්න බැරි නිසා
චූටි දුව නිදිකරවා කම්මුලක හාදුවක් තවරා
අප්පච්චි ගිහින් දුර ඈත
දූගෙ මල් මල් කොට්ටය උඩ
අප්පච්චිගෙ කදුලු තෙත තවමත් ඇති

අහස් වියනට උඩින්
තාරුකාවලට පහලින්
මල් පොහොට්ටු වල කුරුළු ගීතිකාවක
බලන බලන පැත්තේ
අප්පචිචිට දූවම පෙනේවි
ඔය මුවේ කිරි සුවද
නින්දෙදි හීනෙනුත් දැනේවි

පුංචි මල් ගවුමක් අන්දලා
වටයක් කැරකිලා හැඩ බලන්න
ඇවිදින බෝනික්කියක් එක්ක
තරගෙට නැටුමක් නටන්න
පුංචි බංඩියට කිති කවලා
තරගෙට හිනා වෙන්න
යස ඉසුරු හොයාගෙන
අප්පච්චි ගිහින් දුර ඈත

අයිය බබත් එක්ක සන්ඩු නොකර
පොඩි ගල්කැට කටේ නොදමා
අම්මිගෙන් කුක්කු බීල බණ්ඩිය පුරෝගෙන
අප්පච්චිගෙ සුවද කොට්ටෙට තුරුළු වෙලා
රත්තරං දුව නිදියන්න

මේ ලෝකෙ කවුරුත් නොතකපු
අප්පච්චිගෙ හිත ආදරෙන් පුරවපු
රත්තරං සුදු දුවේ ඔයාගෙ සිනාව
කිංකිණි සිනාව
ආයෙත් දකින තුරු
අප්පච්චි බොන කදුළු
චූටි දුව තාම දන්නෙ නෑ.

Read more...

අතීතයේ රලු සුලග

අතීතයේ රලු සුලගින්
අනාගතය වියැලෙන විට
ඔබත් මගෙන් දුරක ගිහින්
සිදු වූ සැම නොසිදු විලස
හිටිහැටියේ අසුරු සැනින්
ඔබ මට මුණ ගැසුනු විටක
මිහිරි මතක හද පාරයි
ඔබට නොදැනි යවුල් විලස

 

ගලක් වගේ රළු හදවත
මෙලෙක් කලේ ඔබම තමා
එසිත කඩා බිම පාගා
නික්ම ගියෙත් ඔබම තමා
යලි කුසුමක් නොපිපෙන්නට
මුල් උදුරා යවට හලා
සොහොන් බිමක ඇති තනිකම
උරුම කලෙත් ඔබම තමා

 

තරු එලියක පල කුමටද
සද පායන රෑ අහසට
අලුයම පිණි දිය කුමටද
දිය නොරදන හිල් බදුනට
රිදියෙන් කල ඔඩම් මොටද
රන් තැටියක මී බොන විට
මද පවනක රැලි කුමටද
සුලි සුලගක් ගැවසෙන විට

 

ලොවම අදුරු කලා නොවේ
දෙනෙත් අන්ද කලා මිසක්
තුන්සිත රිදවුවා නොවේ
හදවත ඉදිරුවා මිසක්
දිය බිම ඉහිරුවා නොවේ
දියට සිගිරි හැලූ මිසක්
ඔබ මට නොලැබුනා නොවේ
මාවද නැතිවුනා මිසක්

Read more...

සුළඟ, ඇය සහ මම..

නුඹ මගේ ගෙට

එන්ට ඉස්සර

දුක කිව්වෙ මං

සුලං පොදකට

 

කවුළු පියනක්

සෙමින් සොලවා

සුළඟ නොගියේ

එහෙම දවසක

ඇරුණු දොරකින්

සුවඳ තවරා

ආව දා නුඹ

මගේ ලොව වෙත
 

 

කවුළු පියනට

මුවහ වී ගෙන

සුළඟ සැඟවිනි

නොදැක හෙමිහිට

 

දිනෙන් දිනගොස්

වසර ගනනට

නුඹ ගියත් යලි

සිටිය පැලවෙත

 

සුළඟ තවමත්

සුවඳ තවරයි

සිතෙ කහටක්

ඉතිරි නොකරම ...

Read more...

පිය සෙනෙහස සැඟව ගොස් දෙවසරකි…..

අඩි හතක් දිග

අඩි තුනක් පලල

රතු පස් ගොඩක් යට

පිය සෙනෙහස සැඟවුන දින…

තවමත් යන්තමින් ගලා යන

එදවස ඇරඹි කඳුළු ගඟුලක් ලඟ

නාම කාය සිතේ ඉතිරි කර

ඔබේ රූප කාය මැකී ගිය දින….

අදට හරියට දෙවසරයි

පියේ ! ගුණකඳ නොමියෙයි

සසරක් පුරා පැතුමයි

යලිත් ඔබ මා පිය වන්නයි…

Read more...

පැතලි මේ බිම නවමු ලෙස…..

සබඳ කෙතරම් මෙහි ඇත්ද

විසල්ව පැතිරි නිල් තණ බිමේ

කෙළවර මිහිදුමට මුවහ වී

උස් නූස් කඳු මුදුන් ………

එකාකාරී මේ බිම

වෙනස්ව දකිනු රිසියෙන්

කැමැත්තෙමි මම නැඟ බලන්ට

එවන් එක් කඳු මුදුනකට….

සිසිල් වා රැළි මුහුනත සිඹින

යලි යලිත් පැමිණ ගත හී ගඩු නංවන

ඈතින් පෙනෙනෙ ගිරි ශිඛර මුදුනේ

කෙතරම් විසිතුරු දේ ඇත්ද?

ස්ථිරය මට මේ පැතලි බිම

අතරින පතර නැඟි ගිරි ශිඛර හා

ගංගා ඇල දොල වන ලැහැබ්

ගැවසි ඇති වග තැනින් තැන …..

සබඳ එක් වන්න මා සමඟ

ගිරි ශිඛර තරණයට යුහු යුහුව

පැතලි මේ බිම නවමු ලෙස

ඉහල සිට විඳිනු රිසිනම්….

2012.09.13

Read more...

එම්බාම්……

වයසට ගිය, තරුණ ළදරු

අතපය කැඩුනු, තැළුනු ,ඇඹරුනු

කාටත් පොදු මරණය

යම් ලෙසක ළඟා වුනු…..

නෑ හිත මිතුරු

වැළඳ සිඹ වැලපෙන

මුහුණු අතගා බලන

ගෙදර යන්ට පෙර

අත සෝදන්ට කරාමය සොයන ….

බඩ පලන, හකු කඩන, කට මහන

ෆෝමලින් විදින, ලේ හලන, ගඳ හමන

කලිසම්, කබා, ගවොම්, සාරි වදෙන්ම අන්දවන

ලණු තුන් පොටක ලා පෙට්ටියට බස්සන …..

උලා නෙක අඳුන්, පීරා මැරුණ කොණ්ඩය

තවරා තොල් මැලියම් ඔබා පුළුන් කට, නාසය

පුරවා පිදුරු රෙදි කෑලි පුම්බා බඩ ගෙඩිය

ගෙනවිත් බාර දෙන සමගින අඩු වැඩිය….

Read more...

අඳුර.......

ඉරි තැළුනු පියන් පතකින් පෙරී එන

සඳ දිය ඇබිත්තක්

මහපටැඟිලි තුඩින්

කළුවරට අවනතව වසාලමි…….

අඳුර කෙතරම් සුන්දරද?

Read more...

මම උඹේ අම්මා….

කාණු පල්ලක ලැග
තෙමෙමින් වැටෙන වැසි දියට
දනන් පා පහර වැද
නුඹව මා මේ ලොවට බිහිකලේ…

නොදන්නා බල්ලෙකුට ජාතක
අවජාතක කුක්කෙකු වුවත්
නුඹ මට මහරු මැණිකකි
කුණු ගොඩක මැස්සන් සමඟ විසුවත්..

මැක්කෝ කිනිතුල්ලෝ
මදුරුවෝ තරඟෙට ලේ උරන
ඒ ලෙයට හරියන්ට
මගේ කුසපොත්තේ ලොට තන
උඹට දුන්නා මතකයි..

දවසක් හැන්දෑකරේ
යාන්තමට ඇහැපියද්දි
එක අණ්ඩක් උස්සගෙන
උඹ බෑරි ගාගෙන පැන පැන එද්දි
ඔය සිඟිති පය තලා පොඩි කල
නම නොදන්න යකඩ සතා
මටත් සැර දාගෙන දිව ගියා..

එදා ඉදන් අද වෙනකම්
තුන් කුන්දු පනින උඹත් එක්ක
ඌ ආයෙ එනකම්
මම මඟ බලා ඉන්නවා…

පසු සටහන : බල්ලන් වාහන පසුපස එලවීම ගම්බද මාවත් වල සුළබ උවත්, නගර වල බල්ලන්ට වාහන හුරුය.
කොහුවල පෙරේරා මාවතේ සිටින එක බැල්ලක් ඉතා අසාමාන්ය ලෙස වාහන වලට කඩා පනියි. ඇය පස්සේ නිතර දැවටෙන පැටවුන් දෙදෙනෙකි. එක් පැටවෙකුගේ කකුලක් බිඳි , නිතර එය උස්සාගෙන් සිටී. මා සිටන පරිදි, ඒ අහින්සක බලු පැටවාට ඒ විපත වන්නට ඇත්තේ වාහන අනතුරක් නිසා විය හැකිය. බැල්ලගේ අසාමාන්ය කෝපය එයට දෙස් නොදේද?
මනුස්ස අප මෙන්ම සතුන්ද දරුවන්ට ආදරය දක්වයි.

Read more...

බොල් වී…

සුළඟත් සමඟ පහලට වැටෙන
රන්වන් වියැට අතරින්
බොල්වී පෙරී වෙන් වී
කමත කෙලවර, ගොඩක් වී නැඟෙයි…

ඉඳහිට එක දෙකක්
සරු වියැට, ඒ අතරට
අහම්බෙන් එකතු වෙයි, නොදැනීම …

උදෑසන බොල් පින්නට තෙමී
එවන් තනි වී ඇට
නිල්වන් නව දළු නඟා
වියලි පොළවෙත් මුල් අදියි…

පොහොයක් දෙකක් ගෙවෙන සඳ
ඒ නව යොවුන් වී පැල
සුළගේ නටන රිදී වන් පත් සමඟ
පුරන් කුඹුරේ කොළ පැහැ මවයි…

ඊළඟ යලට අස්වද්දන්ට
බිම හෙලන පලමු උදළු පහරට
අසරණව අසුවන ඒ පැල පොඩි
කුඹුරටම දිරා පස් වී යයි…

Read more...

පුංචිමහත්තයා….

දන්නා ලෙසට හැකිවිට තම නම ලීව
නෑ සිය පිරිස දෙගුරුන් වත් නැහ කීව
උපනත් ගමේ අසරණ ළඳකට දාව
පිය පරුසවය අප්පෝ බව සිහි පෑව…!

වෙල අසබඩ ඉඳිවුන පොඩි පැල් කොටය
තවෙකුට තබා ඔහුටම වත් ඉඩ මදිය
වලං මුට්ටි සහ ඔහු සතු අඩු වැඩිය
ගෙයි මුල්ලේ පෙට්ටි කබලක ඉඩ සරිය

අඹුවක් කිසිම දවසක නෑ කැන්දෑවේ
වෙරිමත සමඟ අඹුවක් ඇති බව පෑවේ
බනිමින් දෙස් දෙවොල් තබමින් හැන්දෑවේ
බිරිඳැයි සිතා පන් පැදුරට තඩි බෑවේ….!

උදෙහිට රෑ වනතුරු මත් ඇසිල්ලේ
පොල් රා සුවඳමයි මුව විට පෙවිල්ලේ
තොල ගෑ නමුත් රහමෙර ලද ඇසිල්ලේ
ඔහු ළඟ නොමැත නොසරුප් බස් කිවිල්ලේ

ඔහුගේ රැකියාව ගස් ගෙඩි කැඩිල්ලය
ගසකින් ගසක ගොස් බඩ ගා නැඟීමය
කැඩු ගස් ගනන පොල් කොලයක ලිවීමය
ලද දේ සතුටු වී ඉවතට ඇදීමය

දන්නා කවි ශ්ලෝක තරමට නිමක් නැතී
ගයනා විටදි වන්නම් දහ අටම ඇතී
ගිය පාසලක්, පන්සලකුත් ඔහුට නැතී
පොත් දාහකට වැඩි මතකය! දෙය්යො දනී

ඇවිදින බකල ගමනය, මුව හිනාවය
ගමනක් යද්දි හිස පළඳින ජටාවය
පොල් ගස් නඟිද්දී අමුඩය මනාවය
සරම් දෙකින් පිරිමහගත් ප්රමාණය.

දවසක් ගමේ චංඩියෙකුගෙන් ගුටි කෑව
නාහෙන්, කටින් ලේ පෙරමින් දුව ආව
රිදුනත් සියොලඟම එකලෙස මුළු රෑක
ඔහු නෑ ගියේ පොලිසියකට කිසි දාක…

Read more...

වන්නි දෙවොල් බිම…

වන්නියේ වෙඩි සැරට
කැඩී විසිරුණ දෙවොල් තුල
අත් පා සිඳුන - කවන්ධ දෙව් රූ අසල
ඉඳ හිට දැල්වෙන පහන්
තවමත් ඇත …….

අවතැන්ව ගාල් වුන
වන්නියේ ජනතාව
ගෙනැවිත් අතැර දැමූ
බොන්න දිය බිඳකුඳු නොමැතිවම ….

කලකට පෙර - තමන්ගෙම වූ ගේ දොර
අවශේෂ උළුඅහු, කුළුණු පාමුල
එලාගත් ඉටිකොල, පන් පැදුරු මත
දරු මුණුබුරන් සමඟ - පිනට ලද දෙයක් බුදිමින්….

ඒ මිනිස් සිත් වල
එක් විශ්වාසයක් ඇත
කඩා වැටුනු දෙවොල් තුල
තවමත් දෙවියන් වැඩ සිටින බව
තමනට පිහිට වන බව…

2011.08.17

Read more...

සිහිනයක්…..

මේ අදුරු මැදියමේ
කොහේදෝ සිට ගලන
තෙතබරිත කොල පුසුඹ
සැනින් මට අඬගසයි…

වශී වී ඒ මඟට
හනික ඉවකර සුවඳ
ගොළු බසට අවනතව
හනි හනික පා නඟමි…

ගැටී කැබලිති දෙපා
ඇනී මළකඩ කම්බි
ඇදී ගොස් ගවු ගනන්
සිහිනෙන්ම නතර වෙමි…

දොලොස් වසකට පලමු
ඔබෙන් මා සමු ගැනුනු
පාළු සොහොනක් අසල
නතර විය ඒ සුවඳ…!

පිරුණු පස් ගොඩක් යට
දිරා ගිය ඇට කැබලි
ඔබ නොවේ යයි දනිමි
එහෙත්, සිහිවටනයකි….

අතීතේ සුවඳ පොද
ස්වප්නයක ඉවකරන්
මසැස් බැල්මෙන් මුදා
මනැස් බැල්මක් හෙලයි…

ඒ ලොවට ඉගිලෙන්ට
තවම අවසර නොමැත
මේ ලොවට ඇද තබන
එක් පෙකණි වැලක් ඇත…

සොඳුර !ඔබ නවතින්න
තව මදක් ඉවසන්න
මේ සොහොන් පිටියේම
දිනෙක මා සුව සොයමි..

එතෙක් මේ සුවඳ පොද
බිඳක් අහකට ගන්න
අඳුරු රැය කලඹවා
මා වෙතට නොම එන්න…

2011.08.03

Read more...

මහා වාපිය..

මේ ගඟ මෙතැනින් නැවතිනි..

මහ වේල්ල ලඟ
රළපතර නඟන වැවක් ලෙස….

එක් පසෙක,
හිරු රැසින් ගිනියම්ව කැකෑරෙන
පුලින තලයක් ඇත..

සුපෙම්වත් එ ගං කොමළිය
රැඳී තවමත් අනිත් පස නැත
ගැඹුරු කළු දිය කඳ
වැවක් සේ රැළි නඟා හැසිරෙත..

ඉදහිට වහින මහ වැස්සට
වාන් දමන දිය කඳ
පෙරදා රැළි නැඟූ පුලින තලයට
විගස දුව ගොස් දුක කියයි…

2011.07.11

Read more...

අබිසරුලියගේ මධුසමය.

පරණ බඳුනක
අළුත් මිදි යුෂ
දෝත පා පිළිනඟමි
මම ඔබට ….

දහසක් දනන් තොල ගෑ
මේ පැරණි බඳුනේ
මධු බී මත්ව සරනා
කිසිදා මධු නොදුටු
බඹරා නුඹ….

බඳුනට දෙතොල් තබා
රස ඉරූ අය බොහෝය..
ඒ රස මිදි යුෂට
එක්කල හලාහල විෂ
බොහෝය ….

නොකල වරදකට නොදැන
හලාහල විෂ බොන නුඹ
කමා කරන් මට
පසුව ආ වසන්තයකට
පෙම්බැඳි පවට මම…

2011.07.04

Read more...

පිපෙන පරවෙන මැයි මල්……

මේ පිපෙන පරවෙන මැයි මල්
එදවස පිපුණා නම්……

වියපත්ව ,වියළිව
සුළඟින් මිදී තෘණ මත වැටෙන….

මේ පිපෙන පරවෙන මල්
එදවස පිපුණා නම්……

පීදී කරලින් බරව
නෙක තුරු රටා මවමින්
ඵල දරන්නට තිබිණි….

මේ පිපෙන පරවෙන මල්
එදවස පිපුණා නම්……

2011.06.13

Read more...

බස් එක
කොට කොට නොසිට
ඉක්මනට ගෙදර යා ….

අද පඩි දවස ….

පුතාට ගත් හිම කිරම
දැනටමත් බාගයක් දිය වෙලා…

හිම කිරම = ice cream

2011.03.11

Read more...

ගී මී විත

මේ සීමා මායිම් කඩුළු පැන
මී විතක් ගෙන - ගී පොතක් ලඟ
ඇස් අඩවන් කර සම්මෝහ නිද්රාවක
ගී ලියන්නට සිතෙයි මට…..

වැලි බදාම හුණු කුඩු අතරේ
කටු ගෑ සටහන් සිතුවම් අතරේ
මා ආසා කල හද බැඳි කවි සිත
කෙමෙන් කෙමෙන් මිය ඇදෙන්න යාවිද?

2011.03.05

Read more...