බිලාල සිහිනය…

>> Tuesday, July 13, 2010


බළලෙකු සැතපෙන අපූරුව බලන්න…
පාද කොට්ටා තුල උල් නිය සඟවාගෙන
දුඹුරු පැහැ වලිගය පිලිවෙලට තබාගෙන ..
අපිලිවෙල තැන්නක-විසිල අඩ කව වැනි
කළුවන් සම පත්ලේ -හැඟීම් විරහිත ලෙය
නිසොල්මන්ව - නිසසලව……

බළලෙකු සේ සැතපීමට ප්රිය කරමි මම…
කාලයේ සිනිඳු ලොම් තුල .
වියලි රාග ගින්න පිරිමැද
කළුගලක් සේ ගොරෝසු දිවෙන් ,
පියසි හා මිටියාවත් ඉහලින්
විහිදා මා ගත - කිසිවෙකු හා නොදොඩාම
ආශාවෙන් මන්මත්ව
ගොදුරු ලුහුබඳින්නට - මගේ සිහින තුල ….

බළලුන් නිදන සැටි දැක තිබේ මම …
රාත්රිය අඳුරු පැහැ දිය මෙන්
පසු කර තරඟ ලන සැටි නොතකාම ..
විටෙක සීත හිම කඳු මුදුනින්
පහලට ඇදවැටෙයි නොසිතාම..
බිළාලයන්ගෙ මුතුන් මිත්තන් මෙන්
බොහෝ දුර ගොස් නිදි දෙව් දුව සමඟ
වලාකුළු , උස් පියසි, ගිනි කඳු මුදුනින්
අඳුර තුලටම පිමි පනින…

උත්කෘෂ්ට බිශොප්වරයෙකු මෙන්
නිදියන් ,නිදියන් , රැයේ බිළාලය..
ඔබේ ශක්තිමත් වලිගයේ බලයෙන්
කළු ඝනැති උඩු රැවුල් පහසින්
රැක දෙන්න මගේ සිහින සැම
මෙහෙයවන්න අඳුරේ සරන සිත….

පැබ්ලෝ නෙරූඩා විසින් රචිත, “cats Dream” නම් කවි පෙලෙහි පූර්ණ , සංක්ෂිප්ත පරිවර්තනය.


Read more...

ඔබේ ලොවෙන් මගේ ලොවට….

>> Friday, July 9, 2010


බොල් පිණි අහුරු වැටෙන
පාළු නුග ගස පාමුල
සුළගෙන් විසිල මැලවුන පත්
සර සර හඬින් සොලවා
සීත මැදියම් රැයක
නීල වර්ණ දුමාරයක්ව
පුස් බැඳුණ සොහොන් කොතින්
නැඟිට අහසේ සරමි…

කලකට පෙර අතැර ගිය
නෑ සියන් හිත මිතුරන්
සිහින අතරට පිවිස
දොඩමළු වෙමි..තතු විචාලමි
ඔවුන්ගේ මතකයන් තුල
මා පිලිබඳ රැදුනු
මතකයන් අවදි කරවා
අතීතේ මැලවුන සුවඳ පොද
යන්තමින් හෝ විඳිමි…

නින්දෙන් අවදිව දිනක
ඔබේ දහවල ගෙවන විට
අකුණු සැරයක් සේ විටෙක
මා පිලිබඳ මතකය
මනස හරහා ඇඳී යානම්
එයින් දැනගන් සබඳ
පෙරදින සිහින සමයක
ඔබ හා මා එකට
එක තැනක මුණ ගැසුනු වග…

2010.07.07


Read more...

  © Blogger templates Shiny by Ourblogtemplates.com 2008

Back to TOP